Jeshurun's Mind: Kiswahili na Mashairi

Mapenzi Ni Kikohozi, Hayawezi Kufichika

 

Mapenzi ulimwenguni, yaliletwa na Muumba,

Bustanini Edeni, Manani akayapamba,

Na tangu hizo zamani, yakawa ni kumbakumba,

Huwatoa kitweani, wajaliwao wachumba,

Mapenzi ni kikohozi, hayawezi kufichika.

Mapenzi kitu azizi, kwa nisai na rijali,

Katu hayana mjuzi, ulamaa wala nguli,

Huathiri mabazazi, wakawa wenye adili,

Kama lilivyo duwazi, zi wazi zake dalili,

Mapenzi ni kikohozi, hayawezi kufichika.

Mapenzi kama majani, popote pale huota,

Hayazibagui dini, lugha na za watu kata,

Hata rangi ya ngozini, si kitu yanaponata,

Huwatia upendoni, matajiri na wakata,

Mapenzi ni kikohozi, hayawezi kufichika.

Mapenzi huwa utumwa, pindi yakilazimishwa,

Waathiriwa huumwa, bilashi hushughulishwa,

Huku huba wakinyimwa, na wazi kuaibishwa,

Kwa uchungu hufumwa, mwisho nje hurushwa,

Mapenzi ni kikohozi, hayawezi kufichika.

Mapenzi pia huvunda, na kujawa na vituko,

Udhanipo wewe chanda, na yeye ni pete yako,

Ukawa unampenda, kumuona yu mwenzako,

Kumbe unafuga donda, moyowe hauko kwako,

Mapenzi ni kikohozi, hayawezi kufichika.

Mapenzi yalo kiboko, kuyapata ni vigumu,

Usifikiri hayako, mahaba yalo matamu,

Huleta msisimko, ladha ya asikirimu,

Hayazui chokochoko, hung'aa kama nudhumu,

Mapenzi ni kikohozi, hayawezi kufichika.

Mapenzi utathamini, ukiwa unayajua,

Utamuenzi mwandani, hata akikuzuzua,

Utapenda zake mboni, na macho ya kurembua

Na umbo la wastani, nyonda likikuzingua,

Mapenzi ni kikohozi, hayawezi kufichika.

Mpenzi uloridhia, kumuacha si rahisi,

Maradhi ukiugua, yeye kwako huwa nesi,

Na dozi hukupatia, hudumani ni mwepesi,

Kwa unalohitajia, hutamki anahisi,

Mapenzi ni kikohozi, hayawezi kufichika.

Mapenzi ili yadumu, kuyatunza ni faradhi,

Uzinzi huwa ni sumu, huleta mengi maradhi,

Waminifu ni muhimu, hubaidi na kuudhi,

Ni hayo natakalamu, kitunza hutabughudhi,

Mapenzi ni kikohozi, hayawezi kufichika.